Governor-in ran talhna hmun a tlawh

Governor Indra Sena Reddy Nallu chuan nimin zing khan AH & Vety department enkawl Aizawl khawpuia ran talhna hmun Modern Slaughter House, Mualpui a tlawh a; slaughter house chu a nihna ang taka mumal zawka kalpui a nih theih nan ṭan la turin thawktute a chah.

Indra Sena Reddy Nallu chuan, ei leh inte a hrisel ṭha em tih finfiah hmasak fo a ṭul thu a sawi a, "Ran talhna hmun ni loa talh a awm loh nana hmalak a ngai a, Modern Slaughter House hi a nihna ang taka mumal zawka kalpui a nih theih nan thawktute'n ṭan la ang che u," a ti a; ran aṭanga natna kai theihte laka fihlim tura ṭan lak a ṭul thu leh ran talh turte a hrisel em tih talh hma leh hnua enfiah zel a pawimawh thu a sawi.

Modern Slaughter House hi kum 2013-ah hawn niin, Pathianni tih loh kar tluanin ran talh ṭhin a ni a; a hrisel ṭha em tih Vety doctor-in a enfiah ṭhin. Tarlan danin thla khatah chawhrualin ran 500-600 vel an talh tlangpui a ni.