Thla 8 chhungin ruihhlo vbc. 1,797.2 hu man; Mi 870 lakah thubuai 640 ziahluh a ni tawh

Chief secretary Dr Renu Sharma kaihhruaiin October 8, Thawhlehni khan SAD conference hall-ah State Level NCORD meeting vawi 8-na neih a ni a; kuminah January - August thla thleng khan ruihhlo cheng vbc 1797.2 hu man a nih thu leh thubuai 640 ziakluh kaihhnawihah mi 870 man an nih thu tarlan a ni.

Chief Secretary chuan ruihhlo hrang hrang do kawnga enforcement agency-te hmalakna fakawm a tih thu leh tha thlah loa ṭang mar reng tura a duh thu a sawi a, "DC leh SP-te'n ruihhlo do kawnga lungrual taka hmalak a nih theih nan te, a sawt zawk nan tawnhriat leh thu pawimawhte inhrilh-hriat tawn zung zung a nih theih nan in district-ah ṭheuh thla khatah District NCORD meeting vawi khat tal nei ang che u," a ti.

DGP Anil Shukla chuan ruihhlo avanga thubuai ziahluhte chhuichhuah zung zung a nih theih nan Law Enforcement Agency-te ṭanrual a pawimawh thu sawiin, "Drugs mai ni lo zu, vaihhlo leh a kaihhnawih hrang hrangte pawh ngaihthah theih a ni. Mizoramah drugs kaihhnawih thubuai a pun zel avangin NCB Office din a ṭul tawh takzet," a ti a, ruihhlo do kawnga Law Enforcement Agency-te ṭanrual deuh deuh a ṭul thu a sawi.

He hunah hian ruihhlo hrang hrangte do kawnga NCB, Mizoram Police, Excise and Narcotics department, Assam Rifles leh Social Welfare & Tribal Affairs department-te hmalakna thlirlet niin, hmalak chhunzawm zel dan turte sawiho a ni.

Ṭhutkhawmah hian Home secretary, END secretary, state sorkar official-te, NCB, Assam Rifles, BSF leh SIB aiawhte bakah, district hrang hrang DC leh SP-te telin AD NER NCB chuan video conferrence kaltlangin a chhim bawk a ni.