Health Minister-in thawktu indaih lohna avanga Drug Testing Laboratory hman theih loh pawi ti

Health & Family Welfare Minister Lalrinpuii chuan nimin khan MINECO-a damdawi endikna, State Drug Testing Laboratory a tlawh. Minister chuan, thawktu indaih lohna avanga laboratory-ah hna thawh theih a la ni lo chu pawi a tih thu a sawi.

Health Minister chuan mihring hriselna enkawl nana damdawi hman ṭhinte endikna tur State Drug Testing Laboratory bun a nih hnuah a taka hman ṭan a la ni lo chu pawi a tih thu a sawi a, "Thawktu indaih loh vanga damdawi endik ngaite Regional Drugs Test Laboratory, Guwahati-a thawn thlak zel a ni ṭhin hi a pawi. Ministry of Health & Family Welfare hnuaia ‘Strengthening of State Drugs Regulatory System’ kaltlangin State Drug Testing Laboratory building sak a nih bakah, khawl ṭha leh changkang tak tak lei a ni hi a lawmawm a, hetihrual hian mipuiin an hman ṭangkai thuai theih nan thawktu indah vat a pawimawh," a ti a; laboratory chu a tak a hman ṭangkai thuai a nih theih nan a ṭul anga hma la turin thawktute a chah.

He hunah hian Health secretary Sangchhin Chinzah, principal director Dr Vanlalsawma, Food & Drugs Administration joint director Lalsawma Pachuau leh deputy director F Lalliantluanga bakah thawktu dangte an tel.