2022-a vawk suat neitute tan zangnadawmna 25% pe chhuak

Vawk pul hri, African Swine Fever (ASF) vanga kum 2022-a sorkar hriatpuia vawk suat (culled) chhungkaw 1,847 hnena zangnadawmna pek tur zinga 25% chu nimin khan Veterinary Polyclinic Hospital conference hall-ah district hrang hranga sem turin release a ni a; Animal Husbandry & Veterinary (AH&Vety) minister C Lal-sawivunga'n a hmanpui.

Kum 2022-a vawk suat neitu chhungkaw 1,847 hnena zangnadawmna pek tur 25% hi cheng nuai 263.32 a ni a, abak 75% pawh hmuh leh thuai beisei a nih thu sorkar thuchhuahin a tarlang. Zangnadawmna hi district tina thuneitute'n an district ṭheuhah an sem leh dawn a ni.

C Lalsawivunga chuan, ASF hrileng chu Mizoramin a tuar nasa tih a sawi a, "State Disaster-ah dan leh hrai tihfel hnua puan turin hmalak mek a ni. Vety department thawktute'n indaih lo chunga an phak tawka he hri dona kawnga hma an laknate a fakawm takzet a, ranvulhtute tana innghahna tlak ni zel turin ṭan la zel ang che u," a ti a; sorkar pawhin theihtawp a chhuah zel thu a sawi.

ASF a darh zel loh nan fimkhur a pawimawh thu sawiin Minister chuan, "Vawk vulhtute rilru put hmang moral reforms kan mamawh. ASF avanga vawk thite tuihawk luankawr, khama paih leh uluk lo taka phum ching an awm ṭhin hi a pawi hle a, ASF avanga vawk thite sumdawn nana hmang a, zuar an awm ṭhin chu tawp se ka duh a ni," a ti.

He hun hi AH&Vety director Dr R Zothanmawii'n a kaihruai a, Mizoram Pig Farmer Association hruaitute'n thu an sawi bakah, ASF chungchanga hriat tur pawimawhte inzirtir a ni.