Kan hnathawh hian mi harsate inchhung thleng phak se - PC Vanlalruata

Irrigation and Water Resources (IWR) minister PC Vanlalruata hoin nimin khan IWR department hnathawh dan thlirletna, mid-term review neih a ni. Minister chuan, "Kan hnathawh hian mi harsate inchhung thleng phak se," a ti.

PC Vanlalruata chuan, khawvel changkang chho zelah hmasawnnain tui mamawhna a tih san zel thu leh tui hna leh tui humhalh chu mi tin mawhphurhna a nih thu a sawi a, "Kan hnathawh hian mi harsate inchhung thleng phak se, hmasawnna chu miretheite'n a taka an hmuh zel hi kan mawhphurhna a ni tih hre nawn a, thawktuten theihtawp chhuah a, buh leh bala kan intodelh nan irrigation leh tui kaihhnawih a nasa zawkin thawk ang u," a ti.

Sorkarin thingtlangah leh khawsak harsa zawkte tana scheme leh project a chhawpchhuahte ṭangkai leh daihzai taka hman a nih theih nan ngawrh zawka hma la tur leh hna ṭha leh belhchian dawl thawk zui zel tur leh thlithlai zui kawngah ṭan la turin IWR Minister chuan officer-te a chah.

IWR Minister chuan, Mizoram sorkarin Water Policy 2020 leh Water Resources Act 2024-te ngun takin a zirchian leh mek thu a sawi a, "Mizoramin ṭha zawk leh chhenfakawm zawka tui leh tui hna tihpun kawngah ṭan lak a i dawn a, department dangte nen pawh inrawnkhawmna neih chhoh mek a ni," a ti a, theihtawpa tui leh tuihna tihpun kawngah thawktuten ṭan la thar se a duh thu a sawi.

Mid Term Review hi IWR additional secretary V Lalengmawia'n a kaihruai a; division leh sub-division hrang hrang aiawhten an hmalak dante an tarlang a ni.