VUC-in Muanpuia Punte an ko; A thusawi pawm tlak an ti

ZPM Val Upa Council (VUC) chuan thuchhuah siamin, tunlaia social media-a 'ZPM sorkarin an party office hmun atan Assam Rifle Biak-In hmun lak an tum' tih chungchangah October 8, 2024 khan adviser to CM Lalmuanpuia Punte, MLA an ko tih an tarlang.

ZPM VUC chuan Assam Rifle Biak-In chungchanga thuthang lo darh chhuah dan leh a sawi chhuaktute'n ṭan chhana an hmante kimchang takin Lalmuanpuia Punte hian a report tih tarlangin, "Heta a thusawi hi thudik pawm tlak leh fiah dawl tak niin kan hria," a ti.

Lalmuanpuia Punte hi party office hmun zawng tura ruat zingah a tel lo tih tarlangin ZPM VUC chuan, "Chuvang chuan ama thu thua Assam Rifles Biak-In hmun lak sak tum anga sawi hi thil awm ang lo lutuk, mimal hming tihchhiat tumnaah kan ngai," an ti a, pawi an tih thu an tarlang.

ZPM VUC hian mimal hming tihchhiat tuma thudik lo thehdarhtute dan ang taka an chunga action lak a nih theihna tura a titute chhui chhuah a tumna kawngah Lalmuanpuia Punte hi an thlawp tih an tarlang tel bawk.