Mipat hmeichhiatna lam hawia Chief Minister video call ṭhinte chhui chhuah vat phut

Mizoram Pradesh Youth Congress Committee (MPYCC) chuan thuchhuah siamin, "Chief minister Pu Lalduhoma mipat hmeichhiatna lam hawia video call ṭhinte zawng zawng sorkarin chhui chhuak vat rawh se," an ti.

October 7-a MJA leh Mizoram Police ṭangkawpin Serchhip Press Club-a 'Seminar on Cyber Crime' an neihah Chief Minister chuan 'hmeichhe hrang hrang aṭangin sextortion video call vawi 100 chuang ka dawng tawh a, nizan pawh khan vawi eng emaw zat ka dawng a, ka block char char a, min rawn call tute hi hmeichhia vek an ni' tiin a sawi nia tarlangin MPYCC chuan, "Heng hmeichhiate hi an thlalak aṭang chuan an nalh thei em em a, a tak an nih leh nih loh chu ka hre lo, ka block tawh zawng zawng hi za chuang an ni tawh, tih a sawi. He thil hi sorkar mualphona leh kohhran beng tikham thei thil tenawm leh rapthlak takah kan ngai," an ti a, vawi 100 chuang sextortion video call dawng tur chuan CM hian a lo chhanglet ve zauh zauh ṭhin em ni tih chu an zawhna a nih thu an tarlang.

MPYCC chuan Lalduhoma'n mipat hmeichhiatna lam hawia invauna leh thlemna a tawk hi khawvel ram hruaitu dang chunga thleng ngai lo nia tarlangin, "Chhui chhuak ngei turin Mizoram sorkar kan phut a ni. Sex-tor-tion hi website/pornography/sexlink lam lut ṭhin lote leh hmeh tur hmet ṭhin lo tan phei chuan an sex-tor-tion video call hi an tawng mawhin, hetiang buaina hi an tawk ngai lo. Chief Minister hian amah in sawi ropui a tumna lamah in sawi theih nan, amah beitute ruahman ni awmten a sawi zui bawk. A zia loin a zahthlak takzet a ni," an ti.

Chief Minister hi hmeichhia nena sawi zawm a ni fo nia tarlangin MPYCC chuan, "Zanlaiah nula nena whatsapp message-a inbiak te, puipunna hmuna hmeichhia nena lam fo leh khawi lo kalna hmuna hmeichhe kut lo hum vung vung hmuh tur leh hriat tur a awm fo leh, KS market ṭhatzia a sawite phei hi chu Mizoram, Kristian state-a thil thlengah chuan a rapthlak takzet. MNF sorkarah pawh khan mipat hmeichhiatna lam hawia ngaih theih sawi tur a awm fo," an ti a, hetianga sorkarna chelhtute leh mipat hmei-chhiatna inzawm tlat avang hian Mizoramin chhiatna hrang hrang a tawh phah nia an ngaih thu an tarlang.