Cyber crime laka mipuite an himna atan sorkarin theihtawp a chhuah zel dawn - Adviser to Chief Minister

Mizoram Journalist Association (MJA) General Headquarters leh Home department ṭangkawp buatsaih nimin khan Lawngtlai Press Club-ah 'One Day Seminar on Cyber Crime' neih a ni a, he hun hmanpuitu adviser to CM Dr Lorrain Lalpekliana Chinzah, Lawngtlai East bialtu MLA chuan cyber crime laka mipuite himna atan sorkarin theihtawp a chhuah zel dawn thu a sawi.

Dr Lorrain Lalpekliana Chinzah chuan dan ṭha taka zawm chu cyber crime laka fihlimna ṭha ber a nih thu sawiin, "A bik takin Information Technology (IT) Act, 2005 zirchian a, zawm a ṭul hle. Mizoram University-in kum 2021-a zirchianna an neih aṭanga a lan danin, 61.4% chauhin IT Act an hrechiang. Cyber crime chungchang inzirtirna neih ṭhat hi thil ṭul tak a ni," a ti.

Adviser to CM chuan Mizoram sorkarin cyber crime a ngaipawimawh tak zet tih sawiin, "Chief Minister ngeiin 'Seminar on Cyber Crime' khuhhawnna a nei a, sorkarin cyber crime laka Mizoram mipuite him nan theihtawp a chhuah zel dawn," a ti a, seminar-a telte chu mithiam zawkten zirtirna ṭha tak an pek chu uluk taka ngaithla tur leh midangte zirtir chhawngtu ni ṭheuh turin a sawm.

Seminar hi MJA Gen. Hqrs. president C Lalrambuatsaiha'n kaihruaiin, SP Office, Traffic Police, Lawngtlai District Village Council Association, Central Young Lai Association, Lai Stu-dents' Association, Lawngtlai Auto Rickshaw Owners Asso-ciation aiawh, DIPRO leh LADC Information department-a thawktute an tel.