CIJWS ram chungchang sawiho

Kolasib district bawrhsap Robert C Lalhmangaiha kaihhruaiin October 8, Thawhlehni khan DC conference hall-ah Vairengtea Counter-Insurgency and Jungle Warfare School (CIJWS) ram chungchung sawiho a ni.

Sorkar thuchhuah tarlan danin, CIJWS ram luah mek leh ram hauh chin (proposed area) hi kum 2004 aṭanga khan sipai hmun atan land acquisition hmalakna kalpui tawh a ni a, amaherawhchu, he land acquisition hi bogus claim leh court cases hrang hrang avangtein tih khawtlai a nih bakah LA Act dan anga kum tam tak a lapsed tawh avangin kalpui chhunzawm a rem tawh lo a, tun thlengin tihfel a la ni lo.

Hemi chungchangah hian Defence Estate Office (DEO), Guwahati chuan ruahmanna thar siamin, he land acquisition hi tihfel a nih vat theih nan land acquisition hi ṭhuang hniha kalpui turin a ruahman a; a thawh khatnaah CIJWS ram luah chin chu sipai hmun atan lak (acquired) phawt ni se tih a ni.

A thawh khatna atana hmalakna kal zelah hian October 8 khan Kolasib DC kaihhruaiin CIJWS hotute, Forest department, Revenue department leh DEO, Guwahati aiawhte hi an inkawm a ni.

Kolasib DC chuan, CIJWS Vairengte ram luah mek zau zawngte chu Revenue department lam chuan GPS Coordinates an neih vek tawh thu a sawi a, "He ram lak tura district administration-in NOC a pek tur chu Mizoram Forest department lamah zawhfiah ngaite zawh fiah a, phalna hmuh a nih hnuah NOC hi pek chhuah a ni ang," a ti.

Hemi chungchangah hian Forest department aiawh Kolasib Division Assistant Conservator of Forest (ACF) pawhin buaipui ngaite bawhzui kawngah theihtawp an chhuahpui tur thu CIJWS hotute a hrilh a ni.