HMV kal theih hun bituk

Kolasib SP David H Lalthangliana chuan Seṭhawna RTP workshop leh Kawnpui quarry inkar kawng chhia avanga sikul naupangten sikul kal lam leh haw lama harsatna an tawhte a ziaawm theih nan leh chak lehzuala kawng siam hna thawh a nih theih nan Thingdawl leh Kawnpui inkar kawngah zing dar 8-9 leh tlai dar 3-5 inkarah HMV (motor ke paruk nei chin leh a chunglam) tlan tlang phal a nih loh thu a tarlang.

Kawng khar chhung hian Aizawl lam pan HMV-te chu Thingdawl leh Kolasib inkar kawngpui sirah leh Silchar lam pan HMV-te chu Kawnpui dai leh tlang kawng inkar zau laiahte motor veivak tibuai si loa din tur a nih thu tarlangin Kolasib SP chuan, "He thupek hi vawiin (October 9, 2024) aṭanga hman ṭan tur a ni a, thu leh awm hma chu zawm tur a ni. Thupek zawm lo chu MV Act 177 & 179 hmanga hrem an ni ang," a ti.

Thuchhuah chungchanga harsatna tawk emaw, report neite chuan OC Kolasib PS (7085130812), OC Kawnpui PS (9233966362) emaw IC Traffic Cell (9862306914)-ahte biak theih reng a nih thu a tarlang bawk.