KHAWTHLIR

Hmankhat daih sarang an man

Aizawl Municipal Corporation (AMC) chuan hmankhat daih sarang (single use plastic) tihrem tumin hma a la chhunzawm zel a, September 24 -27 chhung khan Aizawl khawpui hmun hrang hrangah plastic carry bag (120 microns aia pan) kg. 49.60, cutleries (plates, spoons & forks) kg. 3.20, wrapping kg. 0.50 leh cups kg. 2, a vaiin kg. 55.30 an man.

Ruihhlo do sawiho

Hnahthial District Level Nasha Mukt Bharat Abhiyaan Committee chu an chairman Rita Lalnunmawii Pachuau, bawrhsap kaihhruaiin nimin khan an ṭhukhawm a, hmalak dan tur an sawiho. Bawrhsap chuan, "Ruihhlo do beihpui thlakna hi state dang zawng aiin kan ngaih thutak a ṭul a, ram leh hnam ang zawngin ṭan lak a ṭul takzet," a ti.

Dilna 167 pawm

Saitual District Implementation Committee (DIC) chuan district bawrhsap Dr Lalngura Tlau hoin nimin khan PM Vishwakarma scheme chungchang an sawiho. PM Vishwakarma Scheme hnuaiah hian trade 18 awmin, Saitual district-ah trade 11 aṭangin kut themthiamna nei mi 413-ten dilna an thehlut a, mi 167-ten stage-I (VC Level) paltlangin, DIC hian dilna 167 kal mekte hi state level-a kalzel turin an pawm a ni.

Methamphetamine leh heroin man

Assam Rifles, Excise & Narcotics department leh Mizoram Police ṭangkawp chuan October 8, Thawhlehni khan Zote huam chhungah heroin gram 294.43 leh Melbukah methamphetamine tablet 2,00,000 an man a, a kaihhnawihah mi pathum an man tel.

MOVCD-NER Phase IV

Hnahthial District Level Monitoring Committee on Mission Organic Value Chain Development for North East Region (MOVCD-NER) phase-IV chu a vawi khat nan October 8, Thawhlehni khan district bawrhsap Rita Lalnunmawii Pachuau kaihhruaiin an ṭhukhawm a; Future Foods Project co-ordinator C Lalnunfela'n scheme kalpui dan tur a sawifiah a, hmalak dan tur hrang hrang an sawiho.