World Mental Health Day hman a ni: Ngaihdam hi damna a ni - Lalduhoma

Nimin khan Volunteers for Community Mental Health (VOLCOMH) bultumin Vanapa Hall-ah World Mental Health Day hman a ni a, khuallian chief minister Lalduhoma chuan ngaihdam hi damna a nih thu a sawi.

Chief Minister chuan kan ngaihtuahna kal dan ang zela lungchhiaa mittui tla mai thei leh hlim taka nui thei kan ni tih sawiin, "Rilru a hrisel loh chuan taksa a hrisel thei lo a, kan dam khaw sei thu hi taksaah chauh ni loin kan rilru lamah a innghat tel. Kan mut theih loh chhan tam takte hi kan rilru lama thil awmte vang a lo ni fo, kan suangtuahna zawk khan mu thei loah min siam ṭhin," a ti.

Midangte ngaidam thei lo mihring hi an dam thei lo tih sawiin Lalduhoma chuan, "Ngaihdam hi damna a ni. Nitin hian duhthlan theih pahnih kan nei, hlim nge lungngaih tih hi? A thlangtu chu keimahni kan ni. Mihringin kan suangtuah, min tihlautu tam tak hi a takin a lo thleng tlem lutuk. Kan rilru lama hrisel lohna kan tawh tam tak hi chutiang suangtuahna vanga lo awm chu a ni," a ti a, kan thil thlir dan a hrisel a pawimawh thu a sawi.

Chief Minister chuan nuna thil lo thleng tam tak hi kan tihdanglam theih loh, kan va inrawlh ve theih lohte an nih thu sawiin, "Nimahsela, chûng thil kan lo dawnsawn dan zawk chuan kan chunga a nghawng dan kha a siam mai zawk a ni. Kan beisei ang thil a lo thleng ta lo a nih pawhin Pathianin duh dan dang a nei a ni tih lo pawm ve leh mai tur a ni," a ti.

Thusawitu dang Health minister Lalrinpuii chuan rilru hrisel nei turin thinlung lam ven ṭhat a ṭul hle tih sawiin, "A bik takin kan hnathawhna hmun hi kan hun tam ber kan hmanna a nih avangin a boruak kan tihnawm thiam a ṭul hle. Midangte ṭanpuitu nih duhna rilru pu chunga kan awm hian boruak nuam zawk a lo chhuak mai ṭhin," a ti a, Health department kaltlanga mental health lama hma an laknate a tarlang.

World Mental Health Day puala inkhawm buatsaih hi VOLCOMH president Prof. Zoengpari'n kaihruaiin, kumin hian thupui atan 'It is Time to Prioritized Mental Health in the Workplace' tih hman a ni.

Excise and Narcotics depart-ment leh Department of Clinical Psychology, MZU ṭangkawp pawhin World Mental Health Day pual hian Ch. Saprawnga Building kawt, Chanmari Vengah hun an hmang a, a mamawhte tan Mental Health Screening Camp buatsaih nghal a ni.