Maxi cab leh city bus an tlan dawn lo; Tanker-te a pangngaiin an tlan dawn
Mizoram Commercial Vehicle Union (MCVU)-in tuialhthei man sang leh kawng chhia avanga October 14, 2024 aṭanga tlan loh an rel angin Aizawl City Bus Owners' Association (ACBOA) leh Mizoram Maxi Cab Owners' Association (MMCOA) chuan thuchhuah siamin an lirtheite an tlan tir dawn lo tih an tarlang. Hetihlai hian tuialhthei phur lirthei (tanker) te chu a pangngaia tlantir an ni dawn.
ACBOA chuan MCVU-in tuialhthei man sang lutuk leh Mizoram kawng chhe lutuk avanga lungawi lohna lantir an rel chu an thlawp tlat tih tarlangin, "October 14 aṭangin tiam chin awm loin khawpui, ZMC leh side hrang hrang leh institution hrang hrang, MZU, NIT, GAC, GCS etc. leh private institution-in an hman zawng zawng, city bus-te che chhuak miah lo turin kan in hriattir a ni," an ti a, an member-te chu Aizawl khawpui chhung duty check point hrang hrangah ṭhahnem ngai taka duty turin an hriattir.
MMCOA pawhin MCVU rel angin October 14 aṭangin an lirtheite tlan tir loh nise an tih thu tarlangin, "Tlan lui an awm a nih chuan an chungah eng pawh thleng se mawh kan phur lo ang. Mahni khaw lama haw tur chi chu tunkar chhungin mahni khaw lamah haw vek a, October 14 zing dar 6 hma pawhin chhuah luih tum loh tur," an ti a, tumah dan ngaia awm loh nise an duh thu an tarlang.
Vanglaini palai zawhna chhangin All Mizoram Petroleum Delears' Association (AMPEDA) president K Lalnghakliana chuan an pawl chu petroleum dealer ang zawnga in din an nih thu a sawi a, "Kan tanker-te tlan tir loh tumna kan neih ka hre lo. A pangngaiin kan tlan tir turah ka ngai. MCVU thurel avanga tanker-te tlan tir loh ve chungchangah engmah thurel kan nei lo," a ti.
K Lalnghakliana chuan kawng chhia avanga hun eng emaw chen an din avanga tuialhthei khaihlak a la pangngai lo deuh thu sawiin, "Hei bakah hian tuialhthei a la harsat chhan chu duh duha load lak tur kan hmuh loh avang te, state pawna kawng chhiaah an tan avangte leh Seṭhawn velahte tangkhang tawk an awm avangte a ni. Tin, sumdawng lirthei nuar tur thawm a awm avangin kan inchuh deuh bawk niin ka hria," a ti a, kawng a ṭhat chuan tuialhthei dinhmun a pangngai vat a beisei thu a sawi.