Tuivai Hydel Project siam tura hmalakna P & E Minister-in enfiah

Power & Electricity minister F Roding-liana chuan nimin khan megawatt 180 pe chhuak thei tura Tuivai Hydel Project siam tura hmalak mekna a hmunah a tlawh a, tihpuitlin theih dan tur a enfiah.

Tuivai Hydel Project hi Central Water Commission (CWC)-in Mw 210 pe chhuak thei turin kum 1992 khan DPR an peih fel a, hmalakzui loha a awm reng hnuah ZPM sorkar a pian veleh he project hi bawhzui nghal a ni. A tirah Mw 210 pe chhuak thei tura ruahman chu, tuikhuah tur hian state ṭhenawm Manipur ram chhung hmun ṭhenkhat a chîm ve dawn avangin; Mizoram sorkar chuan tuikhuah chîm chin hi Mizoram chhung pelh tir loh ni se a ti a, tuiin a chîm chin tur tidanglamin Mw 180 pe chhuak thei turin ruahmanna a siam.

DPR-te siam ṭha a, he hydel project siam thei tur private developer ṭha thlang chhuak a, tender chhuah leh Mizoram sorkarin agreement a sign pui thleng a buaipui tur transaction adviser ruatna atan Department of Economic Affairs, Ministry of Finance chuan Mizoram sorkar cheng vbc. 2.3 a rawn pe. Heng thil pawimawhte buaipui tur hian Ernst & Young LLP te chu Mizoram sorkarin transaction adviser atan a ruat a ni.

Ernst & Young chuan kum khat chhunga tender chhuah fel hman turin hma a la mek a ni. Hmalakna kal mek hi P&E Minister hian a hmunah tlawhin, Tuivai khuahna tur hmun pawimawh laite fangin a enfiah. Ruahmanna ang chuan powerhouse hi Phuaibuang ramah dah tur a ni a, tuikhuah (dam) chu Ngopa aṭanga km 12 a hla, Tuivai-a Livawkkuang hmunah sak turin ruahman a ni.

P&E Minister hi P&E secretary K Lalrinzuali hoin department official-te leh Ernst & Young aiawhte'n an ṭawiawm.