MSPMC-in contractor hna an duhkhawp lo
Mizoram State Project Moni-toring Committee (MSPMC) chuan Chhiahtlang-Serchhip-Keiṭum inkar kawng, National Highway (NH) 54 kawngpui siam meka contractor-ten kawng siamna leh retaining wall siamna atana an hmanraw hman (material) leh an hnathawh quality an duh khawp loh thu an sawi.
MSPMC secretary Lalthan-zuala Ralte hoin nimin khan MSPMC member - H Laldintluanga, Vanlalneiha Ralte, Lalrinawma, Laltlanthangi Ralte bakah MSPMC Task Force member te, MZU leh PWD mithiamte'n Chhiahtlang-Serchhip-Keiṭum inkar kawng, National Highway (NH) 54 kawngpui siam mek hi an endik a, endikna an neih zawhah Serchhip DC conference hall-ah NHIDCL aiawhte leh contractor-te nen an inkawm a ni.
Inkawmhonaah hian MSPMC team-te chuan kawngpui siam mekah hian lei tawlh leh retaining wall chim leh tlabal te, kawngpui bawl leh khuar (potholes) tam lutuk te, leimin venna atana an dah gabion wall chimte bakah leitawlhin a nghawng thildangte a hmunah an endik thu an sawi a; contractor-ten kawng siamna leh retaining wall siamna atana an hmanraw hman (material) leh an hnathawh quality an duh khawp loh thu an sawi a ni.
Lalthanzuala Ralte chuan, NH-54 kawngpui an endik chhan sawifiahin - fur khat pawh daih mang lo, kawng siam zawhfel a nih hmaa kawng chhia tam lutuk te, a dotu bang chim nasa lutuk te leh harsatna dang thlengte avangin Chief Minister duh dan anga endik tura lo kal an nih thu a sawi a; NHIDCL leh contractor-te chu an contract chungchangah leh court hmaah harsatna an hmachhawn lohna turin a ṭha thei ang bera siamṭhat hna rang taka thawk turin a hrilh a ni.
MSPMC team-te chuan contractor-te hian material ṭha karah a ṭha tawk lo hman a awm ṭhin thu te, engineering defect a awm nia an hmuh thu te, pavement innghahna lei insawh nghet tawk lo (subgrade failure) a awm thu te, tuihawk luan kawr an siamte'n duhthu a sam loh thu leh siamṭhat/cheiṭhat ngai thil tam tak an hmuh thute an sawi a; a leilung zirchianna an neih ṭhat leh ṭhat loh te, soil test an neih dante zawt nghalin laboratory-a test an neih zawng zawng te kimchang taka thehlut turin an hriattir a ni.
Contractor-te chuan ruahsur nasa avanga harsatna an tawh dante an thlen nghal a; a theih chin chinah kawng chhia siamṭhat hna an thawh mek thu leh, fûrpui a reh veleh rang taka chak leh zuala an thawh theih an inbeisei thu an sawi.