Ruihhlo hluar zel chhan hi kan hmanraw hmante a hlauhawm lem lo a ni mai thei - Home Minister

Nimin khan ATI Auditorium-ah NDPS Act 1985 hnuaia ruihhlo do leh a kaihhnawih harsatna thleng ṭhinte zirhona, 'Workshop on the Narcotic Drugs & Psychotropic Substances Act, 1985 & General Provisions of Inquiries and Trials: Issues and Challenges' buatsaih a ni a, a hawngtu Home minister K Sapdanga chuan, "Ruihhlo a hluar zel chhan hi ruihhlo dona atana kan hmanraw hmante a hlauhawm lem loh a ni mai thei," a ti.

Home Minister chuan ruihhloin Mizoram min rûn nasa takzet tih sawiin, "Kum tinin a hluar lehnghal. Ṭhalai tam takin nunna an chan tawh a, ruihhlo bawiha tang, chhanchhuah ngai zat hi ṭhahnem tak an awm mek. An khawngaihthlak takzet a, mahse khawngaihna hmanrua ringawt chuan a tidam zo lo a, min chhan chhuak zo lo a, a rem zo hek lo. Heng ruihhlo chi hrang hrang heroin, methamphetamine te, ganja te hi ram pawn atanga lo lut vek an ni a, lirthei hmanga phurh kual an ni," a ti.

Sorkar leh tlawmngai pawlten sorkar dan leh tlawmngai pawlin tharum hmangin theihtawp chhuahin kan do mek tih sawiin K Sapdanga chuan, "Ziaawm lam aiin zual lam a pan zel a ni. Kan dan hmante, kan tharum hmante hian drugs hmanga sumdawngte a tihlau zo lo a, kal velna atana an hman motor neituten an ngai pawimawh zo lo bawk," a ti a, ruihhlo dona atana dan leh hmanrua kan hmathehte hi a hlauhawm lem lo a ni mai theih tih a sawi.

Home Minister chuan Tripura-ah chuan, thing ruk a hluar hle tih sawiin, "Thing bo reng reng chu motor-a phurh vek a ni. Thing ruk phurtu motor an man reng reng a neituten an hmukir tawh lo a, motor tam tak an hreng hman lo, thing bo a reh mai. Keini ramah hian drugs tawlhtu te, phurhsaktu lirtheite hi simna thamin kan hrem ngai lem lo a ni mai thei, tâwn luih kan la nuam viau mai. Thing rûk chuan nunna leh hriselna a khawih chhe phak lo a, mahse simna khawpin Tripura sorkar chuan a dodal," a ti.

Tun hnaiah ruihhlo kawtchhuaha NGO hruaitute nen kan inkawmnaa an sawi chu 'zan khaw tairek thlengin zan tam kan ûm a, kan han man ta cheng a, kan mi man, kan confirm ngei ngeite pawhin police leh court an paltlang a, a tuk lawkah khawlaiah hmuh tur an awm a, diriam takin min chibai ngam a, sorkar leh court-in min tihnual a ni' tih a nih thu sawiin Home Minister chuan, court lama thawkte ve thung chuan, 'Hremna na tak lek turin witness ṭha kan mamawh ṭhin a, witness ṭha tawk neih loh chuan a finfiahna ṭha tawk kan hmu thei lo a ni," tia an sawi ve thung thu a sawi.

Zirhona hi F Laltlansangi'n a kaihruai a, Gauhati High Court judge Justice Nelson Sailo leh Justice Michael Zothankhuma bakah, GHC Aizawl Bench registrar Dr HTC Lalrinchhana leh MSLSA secrtary Gracy L Bawitlung ten thu an sawi bawk a ni.