MTP kum 70 tlin lawm a ni

Mara Thyutlia Py (MTP) chuan October 9, Nilaini khan MADC Golden Jubilee Hall-ah kum 70 (Platinum Jubilee) an lawm a, Siaha bialtu MLA Dr K Beichhua-in hmanpuiin, intodelh turin taimakna a pawimawh thu a sawi.

Dr K Beichhua chuan, MTP hruaitute chu MTP thupui leh dinchhante ngaituah nawn fo turin a chah a, "Midang ṭanpui thei tur chuan intodelh a ngai a, intodelh tur chuan taimakna a pawimawh a ni. Mara ṭhalaite leh mipuite MTP huang chhungah lungrual takin awm ila, rilru thianghlim tak nen thawkho ang u," a ti.

MTP hruaitute chu tlawmngai pawl an nih anga mipui tana thawk tura inpe an ni tih hre reng tura chahin K Beichhua chuan, "Midang tana ke pennaah malsawmna a awm tih hre thar ang che u," a ti a, MTP chu ram tana an rawngbawlnaah tha tho leh chak taka hmalam pan zel turin duhsakna a hlan.

MADC CEM M Laikaw pawhin thusawiin, "MTP chu Mara mipui zawng zawng huam khawmtu an nih bakah Mara hnam dinchhuahna innghahna, hmuh theih leh hmuh theih loh hmelma laka vengtu, hnam dan leh hrai chawisangtu, vawnghimtu an ni a, an mawhphurhna sang tak hi hlen zo thei turin inpumpekna tak tak a ngai," a ti a, rilru thar nen theihtawpa thawk zel turin MTP membr-te a chah a ni.

Jubilee lawmna-ah hian district bawrhsap VL Hruaizela Khiangte pawhin sorkar leh NGO-te inkarah thawhhona ṭha a pawimawh thu sawiin, ram leh hnam hmasawn nan thawhhopuiah kal-khawmte a sawm. MADC executive member K Chhuabei bakah, ECM Assembly moderator Rev. K Laichhua Azyu, Mara Chano Py (MCHP) president P Chaki, MSO presi-dent Elson Eliasah Notlia-ten thu an sawi bawk.

Platinum Jubilee puala poem writing competition a tiṭhate hnenah lawmman sem nghal a ni.