Minister-in Tobacco Free Youth Campaign a tlangzarh

Health & Family Welfare minister Lalrinpuii chuan nimin khan a pisaah National Health Mission, Mizoram hnuaia National Tobacco Control Programme (NTCP) buatsaih 'Tobacco Free Youth Campaign 2.0' a tlangzarh a; E-cigarette siamchhuah, khawlkhawm, phurhchhuah, sawimawi, ram dang aṭanga lakluh leh zawrhte khap a nih thu tarlan a ni.

Lalrinpuii chuan, Mizorama zuk leh hmuam hluar lutuk avanga cancer natna vei an tam phah chu pawi a tih thu a sawi a, "Ṭhangthar zawkte'n he natna ṭihbaiawm tak thlentu pakhat vaihlo an hnar ngam a, an fihlim theihna tur chu kan zavaia mawhphurhna a ni. Sorkar chuan zuk leh hmuam kaihhnawiha kan fihlim theih nan sum tam tak a seng ṭhin a, ram hmasawnna thlen tur chuan a ram mipui vantlangte an hrisel a pawimawh. Chuvang chuan vaihlo ching dawklakte hian sim se," a ti a, a la tichhin lote chu tichhin ve lo turin a chah a ni.

Zirtirtute chu an thawhna sikul ṭheuhah an zirlaite vaihlo laka an fihlim theih nan ṭan la thar lehzual tura chahin Lalrinpuii chuan, "Tobacco free institution in nih theih ngei nan hma la ṭheuh turin ka sawm che u a ni," a ti a, sorkar department hotute chu an enkawl department-te vaihlo awm lohna hmun a nih theih nan khawng taka dan kengkawh turin a chah bawk.

Tobacco Free Youth Campaign 2.0 atan hian campaign an tur chi hrang hrang ruahman a ni a,chu'ng ingah chuan kum anga la tih ngai loh - social media hmanga vaihlo, zuk leh hmuam ṭhat lohna zirtirna a tam thei ang ber puanchhuahte a tel a ni.

He hunah hian NTCP state nodal officer Dr H Lian-thangpuia'n Tobacco Free Youth Campaign 2.0 chungchang a sawifiah a, HFW secretary Sangchhin Chinzah leh NHM mission director Dr Eric Zomawia ten thu an sawi bawk a ni.