Sawhthing chhanchhuahna beihpui thlakin a chingtute a ti lawm dawn - Prof. Lalnilawma

Horticulture department chuan nimin khan  Horticulture meeting room-ah an minister Prof. Lalnilawma hoin sawhthing chhan-chhuahna beihpui an thlak an thlirlet.

Horticulture Minister chuan kuminah sawhthing nasa takin a tâm tih sawiin, "Department-in theihtawp chhuahin a chhanchhuah hna a thawk a, department leh sorkar ai mahin an sawhthing thar hralhna a ṭhat chuan a chingtute an lawm zawk dawn a ni," a ti.

Thlirletnaa tarlan danin, district 11 ah khaw 423 ah chhungkaw 24,274 in sawhthing an ching a, chhungkaw 8,486 in sawhthing tâm an tuar. Chung chhungkaw zinga 6366 te hnenah training pek niin, training an pek zinga 70.45% in a hlawhtlinna an hmu a ni.

Department hotute sawi danin, sawhthing hi a chi an hmuh ang ang an ching a, department remruatna ni lem loin damdawia chiah hmasak lem loh an chin avangin a tâm hi a tam phah.

Chung chhanchhuah hna chu theihtawpa thawh a ni a, MLA leh MP election avang khan sawhthing tâm chhanchhuah hna hi an duh angin an thawk hma thei lo a ni.