Minister hoin PWD leh NHIDCL hotuin kawng sawiho

PWD minister Vanlal-hlana hoin nimin khan a pisaah Mizoram PWD hotute leh NHIDCL Regional office, Aizawl executive manager Vivendar Jokhar-te an inkawm a; Lok Sabha MP Richard Vanlalhmngaiha leh Lunglei West bialtu MLA T Lalhlimpuiate pawh an tel.

Vanlalhlana chuan fûr laiin Mizoram mipuiten kawng chhiat avangin harsatna an tawh ṭhin thu leh Aizawl -Silchar inkar kawng chhia vanga harsatna a tam zual thu a sawi a, "He kan harsatna sukiang tur hian tha thlah lo a, theihtawp in chhuah chhunzawm zel ka duh. Chumi atan chuan a ṭulna piangah PWD leh NHIDCL-te pawh inrâwn tawnin, inpuitawn ṭhin turin ka ngen che u a ni," a ti.

Vivendra Jokhar chuan NHIDCL-in Mizorama an hnathawh tawh chin leh an hmabakte a tarlang a; Aizawl -Tuipang (Tipa) kawng phei chu 90% an thawh zawh tawh thu sawiin, "Kan la thawh lohna hmun tlemte la awm pawh NHIDCL kutah ram hlan a ni loh vang a ni a, kumin June thla aṭang khan ramte pawh NHIDCL kutah a awm vek tawh a, kan hmabakte pawh kan thawk chhunzawm leh theih tawh ang," a ti a; Aizawl-Silchar inkar kawngah pawh ngawrh taka hnathawh mek zel a nih thu leh nakkum March thla ral hmain re-surfacing pawh zawh hman an tum thu a sawi.

Lunglei West bialtu MLA T Lalhlimpuia pawhin, Lunglei-Tlabung inkar kawng dinhmunte tarlangin, a rang lama hnathawh tur hmabak la awmte thawk vat turin NHIDCL hotu chu a ngen.