Siaha-ah Seminar on Cyber Crime

Nimin khan MJA Gen. Headquarter leh Home department ṭangkawp chuan Siaha IPR conference hall-ah 'Seminar on Cyber Crime' an buatsaih a, Siaha bialtu MLA Dr K Beichhua'n a hmanpui.

Dr K Beichhua chuan MJA leh Home department ṭangkawpin tunlaia hluar leh pawimawh tak cyber crime chungchangah seminar an buatsaih chu lawmawm a tih thu sawiin, "Journalist-te hi mi pawimawh tak, sorkar leh mipui inkara palai hna thawktu an ni," a ti a, seminar-a telte chu cyber crime chungchang an ngaihthlak takte a hretu mai ni loa, mipui tam zawkin an lo hriatve nan puangzartu ni zel turin a chah.

Seminar hi MJA Gen. Hqrs. president C Lalrambuatsaiha'n kaihruaiin, Cyber Crime DSP Jeremia Vanlalhmachhuana leh Cyber Crime SI Lalhnehzelate'n cyber crime chungchanga hriattur pawimawhte leh a hremna dan hrang hrangte an sawi. Siaha khaw chhunga NGO hrang hrang aiawh leh Siaha Police-te an tel.