KHAWTHLIR

Presbytery Inkhawmpui

Mizoram Synod hnuaia inkhawmpui lian ber dawttu Presbytery Inkhawmpui chu nizan khan ṭan a ni. Nimin khan kohhran upa thlan tharte exam neih a ni a, Pathianni chawhmaah nemngheh an ni ang. Vawiin leh naktuk chhunah rorel inkhawm neih a ni ang a, zan lamah Pathian biak inkhawm neih tur a ni.

Apex Bank

Apex Bank North Vanlaiphai Branch chu nimin khan bialtu MLA Lalmuanpuia Punte-in a hawng. Apex Bank Branch 29-na North Vanlaiphai Branch hi ATM Booth keng tel nghal tur a ni a, Serchhip district-a Apex Bank Branch pathumna niin, thawktu pathum leh security guard pathum nena bul ṭan tur a ni.

MLA-in pe

Aizawl West-I bialtu MLA TBC Lalvenchhunga, adviser to CM chuan nimin khan a bial chhung veng hrang hranga anganwadi centre 42 hnenah naupang inkhualtelemna (toys-set) a pe. Bialtu MLA chuan kum 2024 chu a bial tana year of education-a a puan thu sawiin, a bial chhunga Anganwadi Centre electric connection la nei lote tan hma an lak thute a sawi.

Zikhlum seng

Hnahthial district-a Cherhlun khuaah fur zikhlum chingtute'n an zikhlum tharte an seng mek a, chhungkaw 42 velin fur zikhlum hi ṭin 40 hmun velah an ching. An zikhlum chin hi ‘Ryozeki variety’ niin, a chi hi Horticulture department aṭanga an dawn bakah anmahniin an inngaihtuah ṭhin. Cherhlun khua hian nikum khan zikhlum hi quintal 900 vel an thara, kuminah erawh nisa leh ruahin a tihchhiat nasat avangin quintal 700-800 vel thar an in beisei a ni.

CS-in hriattir

Chief secretary Dr Renu Sharma chuan, Single Window Portal kaltlanga chak leh rang zawka clearance leh approval pek a nih theih nan leh National Single Window System Portal-a onboard a nih thuai theih nan chak zawka hma la turin sorkar department tinte a hriattir.