Fai hi kan tlin - K Sapdanga

Nimin khan Vaivakawn YMA Auditorium cum Cultural Centre-ah 'Aizawl Faina Hmathlir' neih a ni a, an hun hmanpuitu UDPA minister K Sapdanga chuan Mizote'n fai kan tlin thu a sawi.

K Sapdanga chuan mitinin fai kan duh tih sawiin, "Fai hi kan tlin. Biate leh Ngopa khawlaiah chuan zialbung paih kan zak a, kan ak. Khaw faiah chuan kan rilru a fai mai. Inzirtirna leh inngenna hi a tawk zawh loh chuan, dan hmanga fai tura thupek a ngai a ni mai thei. Ram changkangah chuan tibawlhhlawhtu chawitir an ni," a ti.

UDPA Minister chuan bawlhhlawh paih motor-te hi kan tih bawlhhlawh min rawn phurh fai saktu an nih thu sawiin, zah taka lo dawngsawng ṭhin turin mipuite a chah.

Hriselnain a huat ber chi, boruak tibawlhhlawhtu halpuah hmanga kan hunpui lawm kan ching hi a atthlak tih sawiin K Sapdanga chuan, "Kuminah thupek hmanga khauh taka halpuah khap tum a ni. Bawhchhe lo turin mi tinte ngen an ni," a ti.

Thusawitu dang Aizawl mayor Lalrinenga Sailo chuan, "Khawpui faina turin mimal ṭhahnem takin hma an la a, pawl ang pawhin nasa takin hma an lak aṭang hian faina kawngah kawng a inhawng ṭan niin a lang," a ti a, faina kawngah inpekna thar leh tum tak takna neih a ngaih thu a sawi.

Aizawl Mayor chuan faina mai bakah khawpui mawina a pawimawh tih sawiin, "Thawhhona leh ṭanhona neih ṭhat a ngai. Sorkar mai hi chuan a hlawhtlinna a pawchhuak kher lo ang. YMA leh NGO dangte hmalak leh zual ngai a ni," a ti.

Aizawl Faina Hmathlirah hian chawhnu lamah thupui hrang hrang hmangin mi thiamte'n thu an sawi a, sawiho nghal a ni.