Dawngdah taka contract thawk ṭhinte sorkarin a dim dawn lo - PWD Minister

PWD minister Vanlal-hlana chuan nimin khan NH-06 huam chhûnga Khamrang to Kawnpui kawng siam mêk chu a hmunah a tlawh a, dawngdah taka contract thawkte sorkarin a dim dawn loh thu a sawi.

Vanlalhlana chuan kawng siam chu chak taka kalpui tur leh hetih rual hian mipuite harsatna thlen lo thei ang bera hna thawk turin thawktute a fuih a, "Kawnpui to Khamrâng hi Mizoram mamawh lâkluhna hnukpui a nih avângin a chhe rei thiang lo a, chak taka siam a ṭul a ni," a ti.

Contract hna reng reng, kawng siam a ni emaw thil dangah pawh dawngdah taka hna thawk ṭhinte sorkârin a dim dawn lo tih sawiin PWD Minister chuan, "Mizoram State Project Monitoring Committee-te mit tlung loa hna thawkte chu an phu tawka an chung thu ngaihtuah a ni zel dawn a ni," a ti a, Mizoram sorkar chu kal phung thar sorkâr a nih tawh avangin NH-06 pawh tun hma ang mai maia dawngdaha enkawl a rem tawh loh thu a sawi.

PWD Minister chuan tun dinhmunah NH-06 chu duhthusamin siam hlei thei lo mah se, lirthei engpawh kal theiin enkawl chhunzawm mek a nih thu sawiin, "Kan châk lakna kawng ber a nih avangin englai pawha lirthei kaltlang theiha enkawl chhunzawm zel hi sorkar chuan kan tum tlat a ni," a ti. Kuminah Mizoramin fûr a tawrh nasat thu leh ruah tui tlak chhung a rei thu sawiin Vanlalhlana chuan, "Tunah hian Aizawl khawpui hmun hrang hrangah kawng chhe zual thawm ṭhat mek a ni," a ti a, ruah tui tla tam a ziaawm hunah a aia ṭha lehzuala kawng thawm ṭhata siam a nih zel dawn thu a sawi.

PWD Minister hi adviser to CM (technical) H Ginzalala, MLA leh PWD hotute'n CE (highway) H Zoramliana hoin an ṭawiawm.