Governor-in RBI hotute a kawm

Governor Dr Hari Babu Kambhampati chu nimin khan Reserve Bank of India (RBI), Aizawl Office general manager T Lhungdim leh hotu dangte'n an kawm. Governor chuan sorkar scheme-te chu miretheite chawikan nana duan a nih avangin ngaipawimawh turin RBI hotute a chah.

Governor Dr Hari Babu Kambhampati chuan, mipuite'n bank hman ṭangkai dan leh hemi kaltlanga hamṭhatna awmte an dawn theih nan inzirtirna kalpui nasat a ṭul thu a sawi a, "Bulṭanna tur nei remchang lote'n loan hmanga bul an ṭan theih nan in hnuaia scheme pawimawh tak takte tun aia nasa lehzualin kawhhmuh ang che u," a ti.

RBI service mamawhtute chu panchilh a, an harsatna leh ṭanpui theih dan turte ngaihtuahpui tura chahin Governor chuan, "Sorkar scheme pawimawh tak takte chu miretheite chawikan nana duan a nih avangin ngaih pawimawhah neih tum ang che u," a ti a; financial literacy campaign-in rah ṭha a chhuah em tih enzui ṭhin turin a chah bawk.

RBI hotute chuan Mizorama an hmalakna tlangpuite tarlangin, financial inclusion leh financial literacy campaign an kalpui bakah Lead Bank Scheme priority sector lending hnuaiah target 40% an tihhlawhtlin thute, RBI-in Unified Lending Interface (ULI) a ruahman thute an tarlang a ni.

He huna tarlan danin, India ram state 10 leh union territory 6-te digitise an ni tawh a, Mizoramah chuan Aizawl leh Serchhip district-te digitise fel tawh niin, district dang zawngte pawh digitise tuma hmalak chhoh mek a ni.