CM nen an inkawm hnuah sumdawnna lirthei neitute'n lungawi lohna lantir an ṭhulh

Sumdawnna lirthei neitu intelkhawm Mizoram Commercial Vehicle Union (MCVU) chuan tuialhthei man sang leh kawng chhia avanga October 14, 2024-a lungawi lohna lantir an tum chu chief minister Lalduhoma nen an inkawm hnuah an ṭhulh. MCVU hian Cabinet Meeting thurel an ngaichang dawn.

MCVU chuan October 11, Ningani khan Chief Minister nen an inkawm tih tarlangin, "Chief Minister zahawm takin tuialhthei man sang ti hniam tur leh kawngchhia siam hmanhmawh tura kan ngenna chu Cabinet Meeting hmanhmawhthlak koin October 16, 2024 ah an rel dawn. Cabinet thu chhuak lo nghak tura min ngenna chu zahawm kan ti a, nghah nise kan ti," an ti.

Chief Minister ngenna avangin October 14 aṭanga an lirtheite din tir an tum chu an ṭhulh rih tih tarlangin MCVU chuan, "Mizoram district hrang hranga kan member-te leh min thlawp tute zawng zawng chungah lawmthu kan sawi a ni," an ti a, Cabinet Meeting-in an lungawina zana an thil phutte an ti hlawhtling lo a nih chuan an kal zel dan tur an inhriattir leh tur thu an tarlang.

MCVU chuan kawng chhe chungchangah PWD chan zawngah chak taka hmalak nise tia Chief Minister hoa an rel thu tarlangin, "A chhe zualpuiah sorkar hmalak mek bakah hmun hrang hrang company hrang hrangten an chan chinah chak taka hma la turin Chief Minister-in a lo hriattir ang," an ti.

MCVU tarlan dangte :

▶ MCVU-te'n Chief Minister zahawm tak kan ngenna avangin September aṭanga Mizorama tuialhthei man tihsan chu a revoke (sut leh na) a siam tak avangin lawmawm kan ti.

▶ MCVU chuan Mizoram mipuiten harsatna kan tawh mek sukiang tura theihtawp chhuaha sorkar kan nawrna leh kan hmalakna min support tute zawng zawng chungah MCVU chuan thinlung takin lawmthu kan sawi a ni.