HM chungah doctor-te láwm

Indian Medical Association (IMA), Mizoram State Branch chuan thuchhuah siamin, September 21, 2024 zana Durtlang Leitana an doctor pui pahnihte'n kut an tawrh chungchanga Home minister K Sapdanga hmalaknaah an lawmthu an tarlang.

IMA, Mizoram State Branch chuan, "Kan doctor pui pahnih Synod Hospital, Durtlanga thawkte'n misual kut an tawrh chungchangah sorkarin magisterial enquiry a tih avangin, he thubuai ngai pawimawh em emtu Home Minister chungah lawmthu kan sawi a ni," a ti.

Enquiry ti tura ruat pawhin rang taka enquiry a tih zawh theih avanga an lawmthu tarlangin IMA, Mizoram State Branch chuan, he kut inthlakna chungchangah hian a tisualtute dan hnuaiah an phu ang tawk hremna pek ngei an duh tih an tarlang bawk.