Rualbanlo leh naupangte hamṭhatna sawiho

Social Welfare and Tribal Affairs, Women and Child Development (SWTAWCD) minister Lalrinpuii hoin October 10, Ningani khan a pisaah State Commissioner for Persons with Disabilities, Women and Child Development leh Mizoram State Commission for Protection of Child Rights (MSCPCR) hotute'n naupang leh rualbanlote hamṭhatna chungchanga hmalak dan tur an sawiho.

Ṭhutkhawmah hian Commissioner for Persons with Disabilities hnathawh tlangpui ngaihthlak niin, Rights of Persons with Disabilities Act 2016 (RPwD) danin a phut anga rualbanlote tana hamṭhatna hrang hrang - abikin sorkar hnathawkah 4% hna hauhsak (job reservation), zirna-in sang (higher education institutions)-ah seat 5% hauhsak, vantlang in (public building)-ah rualbanlote tana awlsamna siam leh information & communication lamah electronic media awlsam zawka an hman (access) ve theih nana mitdel hawrawp (braille) leh zaizir (sign language) buatsaih bakah, inthlannaa vote an thlak ve theihna tura hmalaknate sawiho a ni.

Naupang humsual dai, Special Home leh Observation Home-a awm mekte enkawlna lama harsatnate sawiho a ni a; home chhunga zirna-in siam belh leh Juvenile Justice Board (JJB)-in naupang, tuna special home a awm mekte uluk zawk a ennawn leh ni se, an ti. Protection of Children from Sexual Offences (POCSO) hnuaia hremte chu thlir uluk lehzual tura rel a ni bawk.

Lalrinpuii chuan, a department enkawl SWTAWCD hnuaia commission hrang hrang te leh society te, rualbanlo leh naupangte enkawltute inrawnkhawmna hun leh inkawmhona hun hman theih a ni chu lawmawm a tih thu a sawi a, "Kan thil tih kan inhriatsaktawnna hi phurna thar min thlentu ni ngei se ka duh a ni," a ti.

MSCPCR chairperson Jimmy Laltlanmawia chuan naupangte chanvo leh hamṭhatna lama an hmalaknate tarlangin, tunah hian thawktu 22 an awm mek thu a sawi a, "Naupangte social media-a khaw lo deuha tihlan chungchangah thil tisuala puh leh koh (summon) kan nei ṭhin," a ti a, hremna lekkawh a nih dan tlangpui a tarlang.

Women and Child Develop-ment director Zohmingthangi Chhangte chuan an department hnuaia naupang humsual dai, a bik takin ruihhlo ngai leh enkawltu nu leh pa nei lo naupang leh naupang rualbanlote an enkawl dan tlangpui bakah, Child Care Institutions (CCI) 60 an enkawl mek thu a sawi.