Lungleiah Seminar on Cyber Crime

Mizoram Journalists' Association (MJA) Gen. Hqrs. leh Mizoram Police ṭangkawp chuan nimin khan Lunglei Press Club-ah internet kal tlanga pawi khawihna leh dan bawhchhiatna chungchang zir hona, 'Seminar on Cyber Crime' an buatsaih a, Lunglei High Powered Committee (HPC) vice chairman V Malsawmtluanga, MLA-in a hmanpui.

V Malsawmtluanga chuan cyber crime chu tunlai khawvelah mi tinin kan tuar tih sawiin, "Zoram kilkhawr berah pawh kan tuar nasa hle. A bik takin politician-te phei chu a tuar nasa zinga mi kan ni. Thu dik tawk lo leh dik ziktluak lote dawt hmanga inchirhthehna avang tein mi tam takin harsatna leh hmingchhiatna an tawk ṭhin," a ti.

Dan kengkawhtute pawhin huaisen taka hrem ngai chu hrem ngam tura an insan mar a ṭul hle tih sawiin V Malsawmtluanga chuan, "Journalist-te chu mipuite rin tlak thu puangzartu nia ngaih an nih laiin, tunlai khawvelah journalist-te kal tlanga thu dik leh belh chian dawl puan chhuah ngaichang hman lo a, social media-a thu dik lo leh dawt theh darh a tam em em," a ti a, social media-a thudik lo thehdarh chu a Kristian loin, Zo nun ze mawi tihmelhemtu leh Pathian pawi sawina lian tak nia a hriat thu a sawi.

Seminar hi MJA Gen. Hqrs. president C Lalrambuatsaiha'n kaihruaiin, Cyber Crime Cell-a inspector MS Dawngliana'n cyber crime awmzia, a kaihhnawiha pawih khawih leh inbum theih dan hrang hrang, a hrem theih dante leh cyber crime laka inven dan turte a sawifiah.