Mizoram ramri depa BRO kawng sialte hun pawt rei lo thei ang bera zawhfel a ṭul - Governor

Governor Dr Hari Babu Kambhampati leh Project Pushpak chief engineer Girish Prasad Singh chu October 10, Ningani khan Raj Bhavan-ah an inkawm. Governor chuan Mizoram ramri depa BRO kawng sial chu hun pawt rei lo thei ang bera zawhfel a ṭul thu Project Pushpak hotu chu a hrilh.

Governor Dr Hari Babu Kambhampati chuan, Mizoram ramri depa awm Border Road Organisation (BRO) hmalakna zinga kawngpui sial hna thawhte chu hun pawt rei lo thei ang bera zawhfel a ṭul thu a sawi a, "Mizoram hmunhma chu India ram hmun dangte nena a inan loh avangin hmalak dan pawh dinhmunte thlir thiam chunga kalpui thiam a ṭul hle a, in kawng siam, cheiṭhat leh enkawl zui kawngah theihtawp chhuah ang che u," a ti.

Pushpak-in Mizoram tana project pawi-mawh tak tak an siam leh an thawk ṭhin chu lawmawm a tih thu sawiin Governor chuan, "Ṭawiawm che u ka inhuam reng a ni. Thawhhona ṭha hnuaiah project-te zawhfel thuai a nih ka beisei," a ti a, hei hian ramri dep state chawikan leh tihhmasawnna kawnga hmalaknaah Mizoram chu a rin lut dawn tih a sawi.

Project Pushpak CE Girish Prasad Singh chuan, BRO hmalakna kaltlanga kawngpui thar bakah kawng awmsa, district leh ramri dep pawhtu kawngpui thawmṭhat kawnga hmalaknate tarlangin, "Road project-te chu armed force veivahna tinzawn ngawr ngawr ni lo, sumdawnna, tourism leh hmasawnna dang dang atana duan a ni," a ti.

Girish Prasad Singh hian Governor chu October 12, 2024-a BRO kaltlanga project 75-te a ruala Union Defence minister Rajnath Singh-a'n Sikkim aṭanga a hawn tur chu awm hmun aṭanga chhima telpui turin a sawm nghal a ni.