Ruihhlo do kawnga hmeichhiate tihchak lehzual dan tur zirho

National Commission for Women leh Mizoram State Commission for Women ṭangkawp chuan nimin khan Mizorama ruihhlo do kawnga hmeichhiate tihchak lehzual dan tur inzirtirna, 'Awareness programme on empowering women combating substance abuse in Mizoram' an buatsaih a, Social Welfare and Tribal Affairs, Women and Child Development (SWTAWCD) minister Lalrinpuii'n IPR Auditorium-ah a hawng.

Lalrinpuii chuan, ruihhloin Mizoram a tihbuai nasatzia ngaihtuahin hmeichhiate chu thinlung taka tuar nasa berte an nih thu a sawi a, "Mizoram chu golden triangle hnaiha awm a nih avang leh a kawng kan nih avangin ruihhlo hi a hluar a, hei hi hre chungin sorkar kallai chuan urhsun lehzualin ruihhlo chu a do a ni. Ruihhlo chuan a pui a pang, a hmei a pa a thliar lo a, chutihrualin ruihhlo tite enkawlna kan neihte chu mipate tan a nih tlangpui avangin ruihhlo ngawl vei hmeichhiate chu an langsar lo mai niin ka hria," a ti.

Hmeichhiate zinga ruihhlo ngai tam zel chu nawhchizawrhna tihluartu pakhat nia a hriat thu sawiin Social Welfare Minister chuan, "Ruihhlo do kawnga chhungkaw pawimawhna leh nu ten mawhphurhna lian tak kan chelh hi hmeichhiate'n hre thar ṭheuh ang u," a ti bawk.

He hun hi Mizoram State Commission for Women interim chairperson K Lalremruati'n a kaihruai a; SWTA director Dr Lalhriatzuali Ralte-in thu a sawi bakah, mithiamten thil pawimawh hrang hrang an sawifiah a ni.