Taxi-te'n NGOCC hmalakna ringtawk

Mizoram Taxi Association (MTA) chuan tuialhthei man sang leh kawng chhia vanga October 14, 2024 aṭanga Mizoram Commercial Vehicle Union (MCVU)-in an lirtheite tlan tir loh an tumna chu an zawm ve dawn lo tih an puang a, NGO Co-Ordination Committee hmalakna an ringtawk tih an tarlang.

MTA thuchhuah chuan, MCVU General Headquarter-in tuialhthei man sang leh kawng chhia vanga October 14, 2024 aṭanga tiam chin awm loa tlan loh an tumna zawm ve tura MTA a ngen thu a tarlang a; "MCVU-te ngenna hi zahawm hle mah se, tun atan chuan thlawp rih loh mai ni se kan ti a, mipui ten harsatna an tawh loh nan taxi-te service turin dan pangngai anga tlan ni se," a ti.

MCVU-ah an tel ve rih lo tih tarlangin MTA thuhchhuah chuan, "October 7, 2024-a NGO Co-Ordination Committee thuchhuakin, 'Sorkarin tuialhthei mana chhiah lak a tihsan chu ti hniam leh tura ngen ni se,' a tih leh hemi chhunga eng pawl mahin mipuite nghawng thei zawnga harsatna siam lo tura a ngenna chu zahawm an tih avang leh NGO Co-Ordination Committee hmalak tumna chu an rintawk thu an tarlang bawk.