ZPM sorkar hi an la chhe hle - MNF Adviser

MNF chuan nimin khan an pisa-ah chhung inkhawm an hmang a, thusawitu MNF adviser H Biakzauva, ex. dy. speaker chuan ZPM kaihhruai sorkar chu an la chhe hle niin a sawi.

H Biakzauva chuan ZPM sorkar chu enchhin sorkar a nih angin thla 10 kan enchhin tawh nia sawiin, "An la che chhe hle a, tun ang zela an kal chuan an tuarchhuak thei in ka ring lo. Kawngchhiat em em laiin tuialhthei man an tipungte hi thil inhmeh lo tak a ni a, an tuarlo tura ngaihte pawhin an tuar zel. Kan driver-te pawhin MNF sorkar kha an ngai hle niin an sawi," a ti.

Sorkar thla 10 leka upaah chuan mipui sawisel nasat ber ṭum a la nih thu sawiin MNF Adviser chuan, "A chhan chu tih tura an sawi an tih loh leh, tih loh tur an sawi an tih leh si vang a ni. Kalphung thar a awm lo a, an thil thar tihve pawh a ṭha lo lam zel a la ni," a ti a, kalphung thar chu a letlingin a kal mek niin a sawi.

H Biakzauva chuan eptu nih vanga sorkar sawisel reng a ṭul ber lo tih sawiin, "Amaherawhchu, kan ram leh hnam leh mipui tana ṭha lo chu kan sawisel zel dawn. ZPM sorkar hi ka hriat ve chinah chhim lam ngaihsak dertu awmchhun an ni. Mipui pawhin an sawi duh ṭan hle. Chhim lam MLA te hi chanvo pawimawh chang tura fit lo leh a ngaihna hre lo hlir em ni an nih?" a ti.

MNF Adviser chuan mi chet chhiat changa lo phûl luai ai chuan mar pata ṭan lak a pawimawh tih sawiin, "Tumah sorkar reng tur an awm lo ang bawkin, tupawh sorkar thei vek kan ni. Chuvangin, kan sorkar laia kan tihsualte inpawm a, in siamṭhain sorkar leh turin kan hruaitute hnungzui zelin, ṭan ila zel ang u," a ti a, an party aia sorkar leh tura structure lian leh organisation ṭha an awm loh thu a sawi.