KHAWTHLIR

Chief Minister-in Governor a kan

Chief minister Lalduhoma chuan nimin khan hun eng emaw chen damlohna avanga Hyderabad-a inenkawl Governor Dr. Hari Babu Kambhampati chu Raj Bhavan-ah a kan. Chief Minister hian Governor hi hriselna ṭha nei zel turin duhsakna a hlan. Dr Hari Babu Kambhampati hi Hyderbad-a a inenkawl hnuah October 9 khan Mizoramah a rawn let.

ORT Training

Serchhip District Quick Response Team (QRT) te chuan nimin khan District Hospital, Serchhipah chhiatna a lo thlena hliam tuarte bawihsawm dan, basic first aid training an nei a, training-a telte hnenah additional DC Lalrinzuala'n certificate a hlan a ni.

Nomination 22

General Election to Sinlung Hills Council, 2024 atana nomination thehluh (file) theih ni hnuhnung ber, October 10, Ningani thleng khan Aizawl district-a SHC constituency paruk atan mi 22-in nomination an file a; nomination hi INC candidate paruk, MNF candidate pali, ZPM candidate pali leh independent candidate pariatin an file a ni.

Career guidance

Pangzawl Group YMA chuan nimin khan Govt. Pangzawl High School Auditorium-ah career guidance an buatsaih a, Central YMA fin. secretary MS Ralte-in a hman pui. Career guidance-ah hian Pangzawl Higher Secondary School leh Govt High School, Pangzawl bakah Rawpui High School zirlai 200 vel an tel.

Science Congress

Lawngtlai district Childrens' Science Congress vawi 32-na chu nimin khan LADC Hall-ah neih a ni a; project 15-ah zirlaite inelin, inelnaa ti ṭhate hian State Level inelnaah Lawngtlai district ai an awh dawn a, inelnaah hian pakhatna chu PM Shree Model English School niin, pahnihna chu Donbosco School leh pathumn chu Jehovah Jireh English School an ni.

Permit cancel theih

Lawngtlai district transport officer (DTO) Margaret J Vanlalremmawii chuan thuchhuah siamin, State Transport Authority-in lirthei chuan man (fare) a bituk aia sanga fare late chu an permit tihtawp (cancel) sak theih an nih thu a tarlang. Lawngtlai DTO chuan, "Lirthei permit diltute hian permit dilna form-ah, sorkarin chuan man a bithliahte zawm turin an intiam sa vek a ni," a ti a; mipuite pawh sorkarin chuan man a siam anga lirtheite hmang/chuang turin a hriattir.

Parking zone sawiho

Lunglei Municipal Council (LMC) vice chairman K Lalrinawma kaihhruaiin October 10, Ningani khan LMC BoC Hall-ah Traffic & Transport Co-ordination Committee (TTCC) an ṭhukhawm a; The Lunglei Municipal Council (Control of Parking and Parking Fees) Regulations,2024 section 8 in thuneihna a pek anga LMC-a mipui himna tur leh lirthei tawt tihziaawmna tura parking zone leh no-parking zone a hmalak dan tur hrang hrang an sawiho.