Pisa kai hun chhunga awm tluan lote lakah disciplinary action lak tur a ni - Chief Secretary

Chief secretary Dr Renu Sharma chuan October 11, 2024 khan office memorandum a tichhuak a; sorkar pisa kai hun chhunga awm tluan lote lakah disciplinary action lak tur a nih thu a tarlang.

Dr Renu Sharma chuan, sorkar pisa kai hun chhunga awm tluan turin sorkar hnathawkte beisei an ni tih a tarlang a, "Hemi chungchangah hian vawi eng emaw zat thuchhuah siam a ni tawh chung pawhin officer leh staff ṭhenkhat zingah pisa kai hun chhunga pisaa awm tluan lo an awm tih hriat a ni," a ti.

Sorkar hnathawkte chu GAD-in pisa kai hun chhung a bitukte zâwm tura hriattir an ni tih tarlangin Chief Secretary chuan, "Pisa kai hun chhungin pisaah an awm tluan ngei tur a ni," a ti a; pisa bàn hun hmaa pisa chhuahsan lo turin sorkar hnathawk zawng zawng a hriattir a ni.

Chief Secretary chuan, pisa kai hun chhung vawn dik chung­changah sorkar department hotu lu (administrative head)-te'n an hnuaia officer leh thawktute an vil tur a ni tih a tarlang a, "An hnuaia mite'n pisa kai hun chhung pisaah an awm tluan ngei theihna atan discipline an vawng tur a ni," a ti.

Chief Secretary tarlan danin, office memorandum hi tihchhuah a nih aṭanga hman ṭan nghal tur a ni a, thupek zâwm lo an awm a nih chuan an chungah disciplinary action lak tur a ni.