KHAWTHLIR

KṬP-in thisen pe

KṬP, Ramhlun Venglai Branch chuan October 12, Inrinni khan Synod Hospital tan thisen unit 50 an pe a, petute mipa 42 leh hmeichhia pariat an ni. KṬP, Aizawl Branch pawhin Inrinni khan ZMC tan thisen unit 41 an pe a, petute mipa 33 leh hmeichhia pariat an ni.

Sikul endik dawn

Mizoram sorkar hnuaia sikul zawng zawngte chu School Education department kaihhruaina hnuaiah uluk taka endik vek a ni dawn. Sikul endik hi October 7-25, 2024 chhunga kalpui tur a ni a, chumi hnuah sikul thlan bikte endik leh tur niin, chu chu November 8, 2024 hmaa zawh tur a ni. Sikul endikna aṭanga thil hmuh chhuahte aṭangin School Education department chuan a ṭul angin hma an la zui ang.

Sangha dil endik

Fisheries department, Saitual DFDO leh technical staff-te chuan October 11, 2024 khan PMMSY hnuaia sangha dil laih ṭanpuina dawngte hnathawh an endik. DFDO Zomuansangi chuan, Saitual district-a sangha khawitute chu Mizoram tan leh district tana sangha enkawl chungchangah thâ tichak sauh sauh turin a chah.

Tarpauline 2,000 sem

Lunglei district High Powered Committee vice chairman V Malsawmtluanga, Lunglei North bialtu MLA chuan October 12, Inrinni khan a bial chhung khaw hrang hranga kut hna­thawk­­tute hnenah tarpau­line 2,000 a sem a, amah dawr duhte tan public interview a buatsaih nghal. MLA chuan, Bána Kaih Scheme chu thlir liam mai lo a, chhawr ṭangkai tum ṭheuh turin a bial mipui a chah.

MNYF-in tlawh

MNF ṭhalaite chuan October 12, Inrinni khan High School Field, Zarkawta khelmual siam mek an tlawh a, "MNF sorkarin ṭhalaite mamawh hriaa field chhawng siama Zoram tan leh a veng neitu bakah High School tan pawha rohlu tam tak an lo ruahman hi ropui kan ti," tiin an tarlang. MNYF tarlan danin, khelmual siamna atan Aizawl Smart City aṭangin cheng vbc. 16.06 ruahman a ni a; a hnuai ber leh chhawng laitaah motor parking siam a ni a, chumi chungah chuan khelmual siam tum niin, phûllem phah tur a ni.