Bána Kaih Scheme-ah dilna 1,003 a lut tawh

Mizoram Agricultural Marketing Board bultumin October 11, 2024 khan Irrigation & Water Resources Auditorium-ah district hrang hranga District Agricultural Marketing Committee-te tan ‘Bana Kaih Scheme 2024 Sensitization cum Consultation Meeting’ neih a ni a; Bána Kaih Scheme-ah dilna 1,003 a lut tawh tih tarlan a ni.

Inràwnkhawmnaa tarlan danin, Bana Kaih Scheme-ah hian portal kaltlangin progress partner ni tura dilna 1,003 a lut tawh a, diltu 1,003-te hmalak tumna (project)-a sum ruahman zat chu cheng vbc. 182.11 a tling. Dilna dawng tam department chu Commerce & Industries niin, dilna 425 an dawng tawh a; dilna 304 dawngtu AH&Vety department-in an dawt.

Bana Kaih Scheme chungchang zirhona hi Agriculture & Farmers Welfare minister PC Vanlalruata leh Horticulture minister Prof. Lalnilawma ten an hmanpui a; PC Vanlalruata chuan, Bana Kaih Scheme chu loneitute'n sum an hmuh tur hre saa hma an lak theihna tura duan a nih thu sawiin, "An thawh rah dik tak an seng theihna tura ruahman a ni a, kut hnathawktute'n eizawnna ngelnghet an neih theihna tur leh lo hmun nghet an neih theihna turin ruahmanna a ni," a ti.

Prof. Lalnilawma chuan, Horticulture department-in district hrang hranga sawhthing tám beihpui thlakna ‘Operation Ginger’ hlawhtling taka kalpui a nih tawh thu sawiin, "Hmun hrang hranga hmalakna kalpuiah 70.45% hlawhtlinna hmuh a ni," a ti a; Mizo ṭhalaite khai chhuahna tur Bana Kaih Scheme a hlawhtlin ngei theih nan theihtawp chhuah turin thawktute a chah.

Adviser to Chief Minister (Handholding scheme) Dr KC Lalmalsawmzauva pawhin thu sawiin, Bana Kaih Scheme chu kut hnathawktute leh a dawrtute inkarah inrintawkna siam leh leilung hausakna tichhe lo zawnga hmalakna kalpui tura duan a nih thu a sawi.

Zirhona leh inràwnkhawmna hi Mizoram Agricultural Marketing Board member secretary Ramdinliani'n a kaihruaiin, district hrang hranga DC, Rural Development officer, Veterinary & Animal Husbandry officer, Agriculture officer, Horticulture officer, Commerce & Industries officer, Civil Supply officer, Cooperative officer leh Soil Conservation officer-te an tel a; Planning secretary Lalmalsawma Pachuau-in Bana Kaih Scheme 2024 kalpui dan tur a sawifiah a ni.