2024-25 kum kal mekah palliative damlo mi 2,224 enkawl an ni tawh

Health department chuan October 11, 2024 khan Hospital & Medical Education conference hall-ah World Hospice & Palliative Care Day an hmang. Sorkar sum kum (financial year) kal mek 2024-25 chhungin palliative damlo mi 2,224 enkawl an ni tawh a, cancer vei zinga 80% chu dam chhuak lo tura ngaih an nih thu tarlan a ni.

World Hospice & Palliative Care Day hi damlo, dinhmun hlauhawma ding tawhte leh an chhungte’n nun nuam leh hahdam zawka hun an hman theihna tura inenkawlna leh chumi lama inzirtirna ni a ni a; Mizoramah chuan National Programme for Palliative Care (NPPC) hmalaknain October 2016 aṭangin kalpui a ni.

NPPC report tarlan danin, sorkar sum kum 2024-25 kal mekah palliative damlo mi 2,224 enkawl an ni tawh a, chu'ng zinga mi 1,155 chu admit an ni a; palliative damlo thar mi 366 an awm. Home visit ṭum 301 neih a ni tawh a; palliative enkawlna dawng zinga mi 149 an thi a, chu'ngte chu mahni in lamah thi 88 leh damdawi-ina thi mi 61 an ni. Palliative care mamawhte tan Mizoram State Cancer Institute-ah khum 10 leh Lunglei Civil Hospital-ah khum pariat ruahman a ni.

World Hospice & Palliative Care Day hmanna hi HME additional director Dr SR Ngurchamliana'n a kaihruai a; khuallian HME director Dr Lalthlengliani chuan, NPPC chu National Health Mission hnuaiah kum 2016 aṭangin Mizoramah kalpui a ni a, Health departmnent district zinga pakua - Aizawl East (MSCI), Aizawl West (State Referral Hospital), Lunglei, Siaha, Champhai, Kolasib, Serchhip, Lawngtlai leh Mamit district-ahte kalpui mek a nih thu a sawi.

Dr Lalthlengliani chuan, NPPC hnuaiah thawktu mi 12 chauh awm mah se, India rama state tê zinga a ti ṭha berte zingah an tel tih a sawi a, "Palliative care hmanga enkawlna dawngtute hian ngaihsakna an mamawhin hmangaih an ngai a, an harsatna ngaihthlaksak a, anmahni hnemtu nih hi kan mawhphurhna a ni," a ti.

Inkhawmah hian radiation oncologist Dr Lalfakzuala'n kumina Day thupui, 'Ten years since the resolution: How are you doing?' tih hmangin Mizorama palliative care kalpui dan leh hmalaknate a tarlang a; cancer leh natna benvawn khirh zual - HIV/AIDS, kal ṭha lo, thin ṭha lo leh natna dang vei, dam chhuah beiseiawm tawh lote'n na hrehawm tak an tawh lohna turin palliative care kalpui a nih thu a sawi.

Dr Lalfakzuala chuan, cancer vei zinga 80% chu dam chhuak lo tura ngaih an nih thu sawiin, "70%-te hi na hrehawm tuarte an ni a, 90%-te hi nachhawkna nena enkawlna dawng an ni. 30% hi na tak tuarin mual an liam nia chhut a ni bawk. Hetiang a nih avang hian hospice & palliative care hi a pawimawh hle a ni,” a ti.

Palliative Care hnuaiah hian Palliative Care Unit-a damlo enkawl chauh ni loin, thawktute'n damlote an inah tlawhin damdawi leh hmanruate nen an enkawl ṭhin. NPPC hnuaia enkawlna dawng tur hian inziah luh a ngai a ni.