Year of Consolidation puan a nih avangin Bana Kaih hi pilot project anga kalpui a ni - Vanlalhlana

Minister Vanlalhlana chuan, sorkar sum harsatna vanga Year of Consolidation puan a nih avangin financial year kal mekah Bana Kaih Scheme chu pilot project anga kalpui a nih phawt dawn thu a sawi.

Vanlalhlana hian October 12, Inrinni khan Chaltlang Tourist Lodge-a Lily Veng Cultural & Drama Club (LCDC)-in an kum 25-na an lawm a hmanpuinaah thu sawiin, "Kan flagship programme Bana Kaih Policy hi a taka kalpui turin September thla khan tlangzarh a ni a, ṭhalai mahni kutkea ding turte tan ruahmanna hrang hrang awmin, cheng nuai 50 thleng ṭanpuina pek theih a awm. Loan anga kalin sorkar chu guarantor-ah a ṭang dawn," a ti.

LCDC member-te chu ṭhangtharte'n Mizo culture an hriat theih nan hma la zel tura chahin Vanlalhlana chuan, "Ministry of Culture-a Scheme of Financial Assistance for Promotion of Art & Culture hnuaia Cultural Function Production Grant hmangtein fund hai chhuah theih a awm ka beisei a, theihtawpa hmalakpui zel cheu ka tum," a ti a; ruihhlo, HIV/AIDS, zûk leh hmuam lakah fihlim turin a chah.

Jubilee lawmna hi LCDC president Dr H Lalhmachhuana'n a kaihhruai a, zai leh lamte thlirho niin, tlaiah jubilee ruai kilho a ni.

LCDC hi kum 1999-ah din a ni a, member 66 an awm mek a; naupang leh ṭhalai 300 chuang hnam làm leh lemchan (drama) an zirtir tawh a ni.