An beisei anga kawng thawm ṭhat a nih loh avangin tlân dawn lo

Mizoram Truck Driver Association, Mizoram Tipper Association Driver & Owner leh Mizoram Indane Driver Welfare-te chuan NH-06 Sairang leh Durlui inkar kawngpui chu an beisei anga thawm ṭhat a nih loh avangin vawiin aṭangin an tlan dawn lo.

Pawl pathumte hian thuchhuah inṭâwm siamin, October 5, 2024 khan Chief Minister-in Sairang-Durlui kawng chu October 9, 2024 hmaa siamṭha turin NHIDCL a hriattir tih an tarlang a, "Mizoram Truck Driver Association hruaitute'n October 9 khan a hmunah an en a, hmasawnna duhthusam an hmu lo," an ti.

An beisei anga kawng siam a nih loh avangin pawl pathum hruaitute joint meeting chuan Sairang-Durlui kawnga a chhe zualpui leh tlûk hlauhawm khawpa khuar chhe laite thawm ṭhat a nih hma chuan NH-06 kawngpuiah hian vawiin October 14, 2024 aṭangin tiam chin awm loa tlân loh an tum a ni.