Tuithiang YMA-in ruih theih thil tichhia

YMA, Tuithiang Veng Branch Kumpuan Sub-Committee-in an venga ruih theih thil an man khawmte chu October 12, Inrinni zing khan an tiral. Ruihhlo tihralte chu - heroin hawng 3, rakzu ûm 48, sapzu ûm 4, beer bûr 49 leh alprazolam tlêp (strip) 6 a ni.

Tuithiang branch YMA president Vanlalthlana chuan, an khawtlang a thianghlim zawkna turin ruihhlo nei leh zuar hriate chu YMA Kumpuan Committee hruaitute hnenah hrilh ṭhin turin an veng mipui a chah a, "Hetiang kan tih zel chuan kan khawtlang a thianghlim dawn a ni," a ti a; veng dang aṭanga Tuithiang Venga lut turte chu ruihhlo leh a kaihhnawih thil keng lut lo turin a chah.

Vanlalthlana chuan, Central YMA aṭanga ngenna an hmuh angin, naupang kumtling lote zan dar 9 hnu lamah pawna chhuak lo tura an intih chu an veng mite'n an zâwm ṭha rih hle tih a sawi bawk.

YMA, Tuithiang Branch Kumpuan Committee hian kumin 2024 chhungin an vengah heroin (no. 4) hawng 12, rakzu ûm 140 leh sapzu ûm 12, beer bûr 270, ganza gram 500 leh alprazolam tlêp 250 an man tawh a ni.