VC leh LC inthlan campaign hun a tawp

State Election Commission (SEC) chuan thupek chhuahin, April 30, 2015-a village council leh local council inthlan tur atana campaign hun chu nimin tlai dar 5:00 khan a tawp tih a puang.

SEC chuan, "Campaign hun a tawp veleh candidate-te tana campaigner te, election agent-te huam loin, an campaign-na huam chhunga vote nei lote chuan an campaign-na hmun an chhuahsan vek tur a ni," a ti.

District paruk - Aizawl, Lunglei, Serchhip, Champhai, Kolasib leh Mamit district-a V/C inthlan leh Aizawl khawpuia local council inthlan hi naktukah neih a ni dawn a; Mizoram sorkar chuan inthlanna tur district parukah inthlan ni hi holiday-ah a puang.

Campaign hun tàwp hnua phal lohte:

• Inthlan kaihhnawih thila vantlang inkhawm leh kawngzawh buatsaih, kawngzawh leh vantlang inkhawma tel leh thusawi.

• Mipui hnena inthlan kaihhnawih thil cinema, TV leh chutiang lam hmanraw hmanga tihchhuah leh entir.

• Inthlan kaihhnawih thu thehdarh nana musical concert leh mipui vantlang hîp khawm thei tur intihhlimna lam chi reng reng buatsaih.

• Opinion poll/exit poll tihchhuah leh puanzar.

• SMS hmanga campaign.