Hnam dang dawr khârsaktute man

Mizo Ṭhalai Pawl-te chuan nimin khan Aizawl khawpui chhunga hnam dang dawr ṭhenkhat an khârsak a; an thil tih hi dan kalh a nih vangin police-te'n dawr khârtute hi an man a, nimin tlai khan an chhuah leh nghal.

Vanglaini palai zawhna chhangin Aizawl SP C Laldina chuan, hnam dang dawr khârsaktu an mante chu mi 11 an nih thu a sawi a, "Dan kalhin thil an ti a, mi dawr kharsak ngawt theihna an nei lo. Hnam leh hnam, chi leh chi inkara inhuatna thlentir thei, communal harmony tichhe thei a ni," a ti.

Aizawl SP sawi danin, hnam dang dawr kharsak tumtu mi 11 an mante hi nimin tlai dar 3:00 vel khan intiamkamna awm loa chhuah an ni a; dan kalha thil ti tawh lo tura hriattir an ni.