KHAWTHLIR

HSLC result

Mizoram Board of School Education chuan, vawiin chhun dar 12:00 hian High School Leaving Certifcate (HSLC) Examination, 2015 result a tichhuak dawn a, Chaltlanga MBSE Office-ah leh MBSE website - www.mbse.edu.in - ah en theih a ni ang. Result bu hi Rs. 100 in lei theih a ni ang.

MCPA conference

Mizoram Civil Pensioners' Asociation chuan nimin khan Vanapa Hall-ah General Assembly vawi 41-na an hmang a, president H Raltawna'n a kaihruai. MCPA hian sub-headquarters paruk leh branch 131 an nei a, member 7,299 an ni. Kum 2014-15 chhungin an member mi 122 ṭanpui nan Rs. 2,03,500 an séng a ni.

Lirnghing tan tanpuina khawn

Zonet Cable TV chuan Nepal rama lirnghing tuar, Mizote leh an bul hnaia ṭanpui ngaite ṭanpui nan thawhlawm a khawn dawn a,ṭanpuina pe theite chu Zonet Cable TV office, Zarkawtah pe turin an ngen. Ṭanpuina tur tlingkhawmte chu Nepal Mizo Welfare kutah hlan a ni ang.

Thisen pe

Republic HSS-a NSS unit-te chuan nimin khan Aizawl Civil Hospital-ah kalin thisen unit 25 an pe a, a petute hi mipa 19 leh hmeichhia paruk an ni.

Inven dan zirtir

Aizawl District Disaster Management Authority chuan, nimin khan National School Safety Programme hnuaia sikul 250 chuangte tan khuarêl chhiatrupna thlen thulha inven dan tur inzirtirna atan, 'Inter-School Competition on Towards Disaster Resilient Schools' an buatsaih.

IPS sawn

Tun hnai khan Mizorama IPS pathumte chu an awmna hmun sawn a ni. CID (Crime) SP Joseph Lalchhuana chu DIG (Southern Rangte)-ah, Champhai SP John Laldina chu PHQ-ah leh Kolasib SP RP Meena chu Champhai SP-ah sawn a ni.