Stadium sakna lung ṭha lo paih turin ti

Kolasib Venglai branch YMA hruaitute chuan an thudawn bawhzuiin, nimin zing khan Kolasib Venglai Sports Stadium sak mek an enfiah a; an lung hman a ṭha tâwk lo tih an finfiah hnuah an paihtir.

Lung ṭha lo hman a ni tih an hriat avang hian Kolasib Venglai YMA hruaitute chuan hna enkawltu UD&PA department hotute an ko a; contractor Balajee Developers Pvt. Ltd. hotute pawhin lung supply tu C Lallura an ko ve bawk. Lallura chuan, a lung supply chu a ṭha lo tih hre mah se, contractor-te'n an pawm tho vanga supply a nih thu a sawi.

Contractor-te chuan hna an ṭan chauh avangin quality control lamah hma an la hman lo nia sawiin, khawtual mite'n lung ṭha lo an supply duh an rin phak loh thu YMA hruaitute chu an hrilh. YMA hruaitute chuan, contractor chu lung ṭha lo hmang tawh lo tur leh an neih sa pawh paih nghal turin an hriattir a ni.

UD&PA engineer chuan, contractor chu an bungrua hman tur reng reng department hriattir tura tih an nih laiin, an hriattir ngai lo niin a sawi a; UD&PA department hriatpuina lo chuan bungraw supply dawng tawh lo turin contractor chu an hriattir nghal.

Kolasib Venglai Sports Stadium hi cheng nuai 2268 senga sak tura tih a ni a, thla 32 chhunga sak zawh tura ruahman a ni.