Aizawl DEO-in ballot paper a sawifiah
Aizawl District Election Office (DEO) chuan thuchhuah siamin, village council leh local council inthlana ballot paper hman tur chu State Election Commission-in sample a duan anga siam a nih thu an tarlang.
Aizawl DEO tarlan danin, ballot paper-te chuan counterfoil a nei a, counterfoil-ah ballot paper serial number leh elector serial number ziah lanna tur a awm.
Counterfoil hnuaiah candidate-te hming ziah tlar a ni a, a hmasa berah national party-te dah niin, state party-te'n an zui a, registered un-recognised party-in a zui leh a, a tawp berah independent candidate-te hming dah a ni. Candidate hming hi alphabetical order-a rem a ni a, hming bula hawrawp dah (initial) erawh chhiar tel a ni lo.
SEC thupek angin ballot paper atan A4, A3 leh legal hman phal a ni a, ballot paper-a hming inkar zau zawng chu inchi khat a ni tur a ni. A tlangpuiin ballot paper-te chu A4 paper-ah siam an ni a, A4 paper-ah candidate hming paruk column vei lamah a leng a, a leng lo zawng column lehlamah dah a ni. Khua/veng pakhata candidate tam deuh chu phek khata an lan kim theih nan legal paper hman a ni.
Dummy ballot paper-ah counterfoil tihlan tel a ni lo a, chuvang chuan candidate hming hnuai lam chu la âwl zau angin a lang a, mahse a takah chuan âwl a awm lo.
Hetih lai hian, MNF party chuan ballot paper chu mak an tih thu an sawi. National party candidate hming dah zawha column dang aṭanga state party candidate dah chhunzawmin, column a inmil theih lai a, national party candidate zawha state party candidate dah tel a, column inzawn lo deuha siam a ni chu mak an tih thu an sawi a ni.