International NE Trade Expo tawp turin ti Buatsaihtute'n phalna nei kimah an inngai

Lammuala 3rd International North East Trade Expo 2015 neih mek chu dan zawm kim loa buatsaih nia hriat vangin Mizoram Merchants Association (MIMA) chuan vawiin aṭanga titawp turin an ti a; Expo buatsaihtute erawh chuan phalna neih ngai zawng zawng an neih vek avangin tihtawp an tum lo.

Thu dawn danin, MIMA hruaitu ṭhenkhat chuan nimin tlai khan North East Trade Expo 2015 chu an tlawh a, titawp turin an hriattir. MIMA hian expo buatsaihtute chu Mizoram sorkar aṭanga phalna felfai nei loah an ngai a ni.

International North East Trade Expo huaihawttu Ranjan B Gohain erawh chuan, an hriat theih chinah phalna neih ngai zawng zawng an nei vek tih a sawi a; chuvang chuan Expo chu tihtawp mai an tum loh thu a sawi.

Ranjan B Gohain-a sawi danin, Expo neihna hmun neitu Assam Rifles aṭangin phalna an nei a; Aizawl Municipal Council aṭangin phalna an neih bakah, publicity tax Rs. 25,000 an chawi a; Taxation department-ah VAT Rs. 50,000 an chawi bawk. Expo atana an thupui - 'Sarâng ṭawih thei lo aiah a ṭawih thei hmang rawh' tih chu sorkar aṭangin hman phalna an nei a, Sub-Division Magistrate aṭangin aurinna hman phalna an nei bawk a ni.

International North East Trade Expo 2015 hi khuain a bumro avangin May 9, 2015 thleng pawhsei an duh a, Assam Rifles hotute hnenah an dil tawh a ni.