Vanglaini Zirchianna Biate-ah thingpui thar chhuah a pung

Biate khuaa thingpui chíngtute chuan kuminah thingpui an thar ṭha a, an hralh ṭha hle bawk a; chawh rualin ni khatah thingpui aṭangin Rs. 60,000 vêl zel la lut ang an ni.

Biate-a thingpui thar a pun avang hian Biate-a thingpui herna khawl, Samuel Tea Factory chuan ni khata a her theih zat aia tam lak tur an nei thei a; hei vang hian khawl dang bun belh an tum. Thingpui thartute leh factory neitute chuan a tira an beisei aia tam thingpui an neih tak avangin an lâwm hle a ni.

Samuel Tea factory neitu Lal­thanpuia chuan, an factory-in a tam berah ni khata thingpui zik kg. 4,000-5,000 inkar an her thei tih a sawi a; kum 2012-a factory an din aṭangin khawlin a her theih ang tâwk thingpui an her pha ngai lo a, kuminah erawh chuan thingpui thar a tam tak avangin an duh khawp thingpui an her thei ta tih a sawi.

Lalthanpuia chuan, thingpui zîk lei tur a tam tak chhan chu a hmaa kg. khat Rs. 12-a an lak ṭhin chu kumin aṭangin Rs. 15-a an lak tak vang nia a rin thu leh thingpui chingtute tan a hlâwk tâk vang nia a rin thu a sawi a; an khawl neihin a her sên tawh loh avangin khawl lian zawk bun tuma hmalak an tum thu a sawi a ni.

Biate Tea Society hruaitute chuan, ni khatah a náwlpuiin thingpui zîk kg. 30-50 inkar an sik hman tih sawiin, a sik chak zual chuan ni khatah kg. 70-80 te an sik thei tih a sawi a; kg. khat Rs. 15-a an hralh tâk avangin mi pakhatin ni khatah Rs. 1,000 chuangte an la lut thei a, mistiri hlawh aia a hlâwk avang leh a hahdam zawk avangin an lawm tih a sawi bawk.

Biate khuaa thingpui chíngtute hian kar khatah Rs. 2,40,000 vel an la lut thei tawhah an inngai a, thla khat a tlin hunah chuan Rs. 9,00,000 chuang an lak luh an beisei a ni.