Card var tan buhfai man a pung tawh; Sorkarin thla tin nuai 525 a hum phah

Food, Civil Supplies & Consumer Affairs (FCSCA) department chuan October 2024 aṭangin ration card var neite tan buhfai man a tipung a; buhfai sem leh hmasa ber aṭangin ration card var neite buhfai khul man kg. khatah Rs 30 a ni tawh dawn. Hei vang hian Mizoram sorkarin thla tin cheng nuai 525 a hum thei tura ngaih a ni.

Vanglaini palai zawhna chhangin FCSCA minister B Lalchhanzova chuan, ration card siamṭhat zawh la ni chiah lo mah se, ration buhfai sem leh hmasak ber aṭangin ration card var neite tan buhfai man a pun tawh dawn thu a sawi a, "Buhfai man tihto a nih rual hian retailer lawmman pawh tihpun nghal a ni dawn. Mizoram pumah a rualin ration card var tan buhfai man hi tihto a ni ang," a ti.

B Lalchhanzova chuan, ration card endik mek zel a nih thu sawiin, "AMC huam chhungah chuan zawh deuh vek a ni tawh a, veng ṭhenkhat la zo lo deuh an awm. AMC pawn lamah chuan October aṭangin ration card endik hna kalpui ṭan a ni. Ration card endiknaah hian mipuite'n an ration card tur dik tak an neih theihna atan theihtawp chhuah a ni," a ti a, ration card-ah induhsakna lantir a thian loh thu a sawi.

Ration card var neite chuan ration buhfai October thla quota sem a nih aṭangin kg. khat Rs 15-a an lei ṭhin chu Rs 30-in an lei a ngai tawh dawn a; retailer-te'n buhfai kg. khata Re 0.50 (duli) an hlawh ṭhin chu Rs 1.50-ah tihsan a ni.

FCSCA department chhût danin, ration card var neite tana buhfai khul man tihsan a nih avang hian Mizoram sorkarin thla tin cheng nuai 525 a hum thei dawn a, kum khatah chuan cheng nuai 6,311 a hum thei dawn. Tun hma chuan kum khatah buhfai subsidy-ah cheng nuai 13,500 vel sèn ṭhin a ni a, ruahmanna tharah chuan cheng nuai 8,000 vel sèn a ni ang.

Supply department ruahmanna vêk hian Chief Minister, minister, MLA leh group A officer-te'n ration buhfai lakna atana ration card an neih ṭhin chu tihtawp ṭan mek a ni. Department hrang hrangah group A officer-te list dil niin, FCSCA-a an thehluh hnuah buhfai lakna atana hman tur ni lo, document pawimawh atana hman tur ration card siamsak ṭhin a ni.