Tuialhtheia harsatnate tiziaawm turin theihtawp kan chhuah reng - AMPEDA

All Mizoram Petroleum Dealers Association (AMPEDA) chuan thuchhuah siamin, Mizoramah tuialhtheia harsatnate tiziaawm turin theihtawp an chhuah reng thu leh tuialhthei a hlâwma bûra a man dik taka an pek ṭhin chu dan loa hralh (black) a nih loh thu an tarlang.

AMPEDA chuan, "Tun hnai kawng ṭhat tâwk loh leh thil dang vanga Mizorama oil lo lutte a khaihlak deuh avanga mipuiin duh thála oil kan hmu thei lo hi tihziaawmna atan AMPEDA hian theihtawp a chhuah reng a, mutmu pawh tuah loin mipui harsatna sutkian dan kawng zawngin a hmanhlel hle a ni," an ti.

Tuialhthei lak luh leh hralh chhuah chu Marketing Discipline Guidelines anga kalpui a nih thu sawiin AMPEDA chuan, "Contractor leh bulk consumer - petrol pump awm ve lohna khuate tiamin, chhûn-lâwn, mipui náwlpui mamawh lak hun laia inrawlh buai lo a, zan lam mipui thâwl tawh hnu chângin, mipui tibuai lo zawnga oil pek ṭhin an ni. A hlawma bûra pek ṭhin, rate dik taka kan pek ṭhinte hi black a ni lo," an ti a; Mizoram a ni emaw, Manipur a ni emaw, khawi state mahin quota an neih hran loh thu an sawi.

AMPEDA chuan, petrol pump-te chu mimal sumdawnna a nih thu sawiin, "Oil company lamin a tam thei ang ber hralh tura a beisei kan ni a, target pawh tuk kan ni. Kan hralh tam hian sorkarah tax kan chhung hnem thei a, mipui mamawh inrêlbâwlnaah thâ nasa takin kan thawh ve ṭhin," an ti.

Mizoramah tuialhthei emaw, thil dang emaw pawh, harsatna a awmin dawhkan kîla sawiho a, sutkian dan kawng zawn zel an duh thu AMPEDA chuan an tarlang a, "Pawl ṭhenkhatte'n an nawm an mâka tih tur leh tih loh tur intuk (impose) hi kan kal dan turah kan ngai lo a, Govt. of India guidelines hnuaiah fel taka kalpui kan ni," an ti. Pawl ṭhenkhatin social media-ah thu dik famkim lo an vawrh darh ṭhin chu ṭha lo an tih thu an tarlang bawk.